CONVENTICULUM LATINUM 2009

Latine // Anglice...

Permultis linguae Latinae cultoribus non solum Americae Septentrionalis regiones, verum alias etiam orbis terrarum partes habitantibus iam innotuerunt conventicula Latine loquentium, quae Lexintoniae in civitate Kentukia quotannis celebrantur, quorum participes Latine interdiu sermocinantes, Latine noctu somniantes, Latine noctes diesque viventes communitate quadam atque sodalitate fruuntur iucundissima. Itaque omnes Latine loquendi studiosos diligenter legere oportebit hunc nuntium. Conventiculum nostrum anno bis millesimo nono a mensis Iulii die sexto (6) usque ad diem decimum quartum (14) agitabitur, cui qui interfuerint oblectamentis cum in conventiculo usitatis tum etiam aliquot novis delectabuntur.

QUALIA SINT CONVENTICULA NOSTRA

Eo in primis proposito ad conventicula nostra veniunt tot homines tam iuvenes quam aetate provecti, ut peritiam aliquam ex tempore et Latine de multis argumentis sermocinandi adipiscantur. Id tantum in ipsis sessionibus agitur ut conventiculi participes facultate Latine loquendi, audiendi, intellegendi, scribendi assuefiant. In hoc tantum cottidie ab horis matutinis usque ad vespertinas summa opera et contentione incumbitur. Non solum disseritur et disputatur de litteris deque libris, sed argumenta quoque nostra ad res cottidianas, familiares, domesticas spectant.

Huiusmodi conventicula linguam Latinam discere iam ingredientibus nec ultra elementa prima progressis haud sunt idonea. Itaque invitantur illi qui monumenta scripta satis bene legere queant, qui normas regulasque grammaticas magna saltem ex parte compertas habeant. At peritia Latine loquendi nequaquam est necessaria. Sermonis extemporalis omnino rudes libentissime invitamus, immo adhortamur ut adfuturi sint vivaque Latinitate nobiscum fruantur.

Credimus sessiones nostras litterarum magistris, professoribus, omnibus, qui aliquam Latine sermocinandi, disputandi, scribendi facultatem consequi cupiant, magno fore subsidio et emolumento. Prosunt conventicula nostra vel illis qui Latine loqui et scribere sciant, sed occasionem expetant facundiae exercendae commodam et iucundam. Denique, id quod haud minimi momenti videtur, qui nostris interfuerint sessionibus postea invenient scripta sese Latina quodammodo facilius, citius, melius legere et intellegere posse - idque multo maiore cum fructu.

Neque praetermittendum est illud, quod dirigentur colloquia nostra ad normas grammaticas illorum auctorum proprias, qui aurei et argentei nonnumquam appellantur, quorum sermo ad omne argumentum mirum in modum accommodatus atque elegantia quadam insignis esse videatur. Ad vocabula scilicet et voces recentioris et recentissimae Latinitatis proprias nonnumquam confugiendum est: aliquando, etsi multo rarius, vocabula prorsus novanda et fingenda. Hac in re humanistas optimos, qualis erat Erasmus, qualis Marcus Antonius Muretus, quales alii permulti, imitari volumus, qui ut sermonis antiqui structuram et compagem grammaticam conservare studebant, ita novas voces, cum opus fuerat, non gravate usurpabant. Fontes igitur conventiculi participibus commendabuntur unde voces recentiores commode inveniant et mutuentur. Praeterea quibus sermonibus conveniant vocabula recentiora novatave, quibus sufficiant antiqua, omnes una et coniunctim considerabimus.

DE ADEUNDI PRETIO DEQUE DIE PETITIONIBUS ULTIMIS DICTA

Aditum in conventiculum petentibus nonagena dollaria sunt solvenda. Scitote nos adeundi pretium iis rependere non posse, qui post pecuniam erogatam participandi consilium mutaverint.

Quaesumus ut qui conventiculo interesse constituerint sua dent nomina pretiumque adeundi exsolvant ad KALENDAS APRILES, quae est nominibus accipiendis et inscribendis DIES PRAESTITUTA. At quo quis maturius rogaverit ut in conventiculum conscribatur, eo verisimilius erit locum ei dari posse. Nam haud plus triginta petitores novos (h.e. homines, qui conventiculo Lexintoniensi antea numquam interfuerint) anno bis millesimo nono nobis licebit admittere. Quasdam enim sessiones hominibus Latine loquendi minus peritis destinatas in conventiculo quotannis adornare et instruere solemus, unde maximum emolumentum accipiunt tirones, qui non sint plures quam ut commode inter se colloquia serant omnes.

Die conventiculi primo (h. e. mensis Iulii sexto) nullae sessiones ordinariae agitabuntur, sed convivium initiale et aditiale (ut sic dicamus) ab hora sexta vespertina ad nonam decimamve celebrabitur, cui convivio ut unusquisque intersit enixe rogamus et obtestamur. Quolibet sermone, sive patrio sive alio, in convivio aditiali licebit comissantibus uti - quamquam auctores sumus ut etiam in primo illo congressu participes, si possint, Latine loquantur. Attamen, convivio aditiali peracto, nihil inter ipsas sessiones dicetur nisi Latine, nullam per totum conventiculum linguam usurpabimus nisi Latinam.

DE DEVERSORIIS

Participes nonnullis modis Lexintoniae commorari poterunt: I) In xenodochio discipulorum: qui suum et proprium cubiculum habebit, noctibus singulis vicena quina (25) dollaria (vectigalibus inclusis) solvet. Hoc xenodochium est in Academiae campis satis commode situm, unde homines brevissimo itinere ad locum sessionibus destinatum facile ambulare queant. At hoc in hospitio manentibus necesse erit balneis communibus uti. II) In 'Rubro Tecto': qui septem dies minimum ibi manebit, noctibus singulis quinquagena (50) dollaria (vectigalibus inclusis) solvet. At ibi deversantibus opus erit vehiculis quibus inter deversorium et conventiculi sedem commeant . III) In hospitio 'University Inn' nominato: qui suum et proprium cubiculum habebit, noctibus singulis sexagena septena dollaria et denas centesimas (67.10) (vectigalibus inclusis) solvet. Oportet tamen lectores intellegere haec pretia nobis tempore aestivo esse anno bis millesimo octavo indicata et fieri posse ut nobis insciis mutentur.

DE POPINIS

Nonnulla etiam in Studiorum universitatis campis et in regione propinqua exstant refectoria, ubi pretio emitur cibus multo minore quam in popinis urbanis. Erit praeterea mos noster ut, quoties commodum fuerit, cenam quandam communem apparemus, eamque sub divo, si caelum fuerit serenum. Qui talibus cenis communibus fruentur multo minus erogabunt pecuniae quam qui in popinis cenabunt.

Omnes qui huic conventiculo interesse meditamini ad Terentium Tunberg, linguae Latinae professorem, scribatis oportet, cuius est haec inscriptio cursualis electronica: terence.tunberg@gmail.com.

Anglice...

LATINITAS ~ http://www.uky.edu/AS/Classics/latinitas.html

 

September 04, 2008

Site Design:
J. Francis and Ross Scaife