Kentucky Classics

"Non enim tam praeclarum est scire Latine quam turpe nescire."
Cicero, Brut. 37.140


Latinitatis vivae colendae causa condita est Societas Latina Lexintoniensis. Socii statutis temporibus (aut semel aut bis in hebdomade) congregantur ut simul colloquiis Latinis simul sodalitate iucunda fruantur. Sessiones moderatur Terentius Tunberg litterarum Latinarum cervisiaeque bonae amator (inscriptio electronica: clatot at pop.uky.edu). Coetum nostrum frequentant nonnulli qui in Universitate Kentuckiana operam studiis dant Latinis. Etiam advocantur, asciscuntur, acciuntur alii qui regiones oppido Lexintoniae adiacentes incolunt sermoni Latino, congerronibus facetis, colloquiis lepidis et festivis dediti. Sed quemlibet quamvis longe remotum invitamus ut nomen det suum et inter amicos nostros numeretur.

SI LINGUAM LATINAM AMAS, AMAMUS TE!

Celebrantur quotannis Societatis Latinae Lexintoniensis auspiciis conventicula aestiva, quae in alio huius paginae descriptivae capitulo plenius tractantur.

Omnes qui Latinitatem vivam colere, colloquiis Latinis frui cupitis, vos invitamus ut SOCIETATIS LATINAE LEXINTONIENSIS inter socios numeremini.

Societatis Latinae Lexintoniensis

Semel in hebdomade, die Veneris, hora tertia et dimidia postmeridiana, in cauponam quae nominatur "Common Grounds" convenient sodales Latine confabulandi causa. Die mensis Septembris vicesimo septimo erit consessus primus. Inter sessiones ipsas nihil nisi Latine dicetur.

Qui plura de hac sodalitate discere cupiveritis, professorem Terentium Tunberg alloquamini oportebit, cuius est haec inscriptio electronica: clatot at pop.uky.edu et numerus telephonicus 257-8453

Kentucky Classics