Department of Modern & Classical Languages, Literatures, & Cultures
1055 Patterson Office Tower | University of Kentucky | Lexington, KY 40506-0027
ph: 859 257 3761 | fax: 859 257 3743 | e-mail: classics-at-lsv.uky.edu
|
|
Division of Classics Department of Modern & Classical Languages, Literatures, & Cultures 1055 Patterson Office Tower | University of Kentucky | Lexington, KY 40506-0027 ph: 859 257 3761 | fax: 859 257 3743 | e-mail: classics-at-lsv.uky.edu |
|---|
Permultis linguae Latinae cultoribus non solum Americae Septentrionalis regiones, verum alias etiam orbis terrarum partes habitantibus iam innotuerunt conventicula Latine loquentium, quae Lexintoniae in civitate Kentukia quotannis celebrantur, quorum participes Latine interdiu sermocinantes, Latine noctu somniantes, Latine noctes diesque viventes communitate quadam atque sodalitate fruuntur iucundissima. Itaque omnes Latine loquendi studiosos diligenter legere oportebit hunc nuntium. Conventiculum nostrum anno bis millesimo septimo a mensis Iulii die vicesimo sexto (26) usque ad diem mensis Augusti alterum (2) agitabitur, cui qui interfuerint oblectamentis cum in conventiculo usitatis tum etiam aliquot novis delectabuntur: nam creberrimis loquendi exercitiis exercitia quaedam scribendi anno bis millesimo septimo addentur. Etenim qui expedite loquitur, facilius scribit; qui bene scribit, emendatius loquitur.
Eo in primis proposito congregabuntur participes ut peritiam aliquam ex tempore Latine sermocinandi permultaque Latine exprimendi adipiscantur. Id tantum in ipsis sessionibus agetur ut socii facultate Latine loquendi, audiendi, intellegendi, scribendi assuefiant. In hoc tantum cottidie ab horis matutinis usque ad vespertinas summa opera et contentione incumbetur. Non solum disseretur et disputabitur de litteris et libris, sed argumenta quoque ad res cottidianas, domesticas, familiares spectabunt.
Huiusmodi conventicula tironibus, id est Latine discere tantum ingredientibus, haud sunt idonea. Itaque invitantur illi qui satis bene Latine legere queant, qui normas regulasque grammaticas magna saltem ex parte compertas habeant. At peritia Latine loquendi nequaquam erit necessaria. Sermonis extemporalis omnino rudes libentissime invitamus, immo adhortamur ut adfuturi sint vivaque Latinitate nobiscum imbuantur.
Credimus sessiones nostras litterarum magistris, professoribus, omnibus, qui aliquam Latine sermocinandi, disputandi, scribendi facultatem consequi cupiant, magno fore subsidio et emolumento. Prosunt conventicula nostra vel illis qui Latine loqui et scribere sciant, sed qui occasionem expetant facundiae exercendae commodam et iucundam. Denique, id quod haud minimi momenti est, qui nostris interfuerint sessionibus postea invenient scripta sese Latina quodammodo facilius, citius, melius legere et intellegere posse - idque multo maiore cum fructu.
Neque praetermittendum est illud, quod dirigentur colloquia nostra ad normas grammaticas illorum auctorum proprias, qui ÔaureiÕ et ÔargenteiÕ nonnumquam appellantur, quorum sermo ad omne argumentum mirum in modum accommodatus atque elegantia quadam insignis esse videatur. Ad vocabula scilicet et voces recentioris et recentissimae Latinitatis proprias nonnumquam confugiendum est: aliquando, etsi multo rarius, vocabula prorsus novanda et fingenda. Hac in re humanistas optimos, qualis erat Erasmus, qualis Marcus Antonius Muretus, quales alii permulti, imitari volumus, qui ut sermonis antiqui structuram et compagem grammaticam conservare studebant, ita novas voces, cum opus fuerat, libenter usurpabant. Fontes igitur sociis commendabuntur unde voces recentiores commode inveniant et mutuentur. Praeterea quibus sermonibus conveniant vocabula recentiora novatave, quibus sufficiant antiqua, omnes una et coniunctim considerabimus.
Aditum in conventiculum petentibus octogena dollaria sunt solvenda. Scitote nos adeundi pretium iis rependere non posse, qui post pecuniam erogatam participandi consilium mutaverint.
Quaesumus ut qui conventiculo interesse constituerint sua dent nomina pretiumque adeundi exsolvant ad Kalendas Apriles, quae est nominibus accipiendis et inscribendis praestituta dies. At quo quis maturius rogaverit ut in conventiculum conscribatur, eo verisimilius erit locum ei dari posse. Nam haud plus quadraginta quinque participes anno bis millesimo septimo nobis licebit admittere.
Die conventiculi primo (h. e. mensis Iulii vicesimo sexto) nullae sessiones ordinariae agitabuntur, sed convivium initiale et aditiale (ut sic dicamus) ab hora sexta vespertina ad nonam decimamve celebrabitur, cui convivio ut unusquisque intersit enixe rogamus et obtestamur. Quolibet sermone, sive patrio sive alio, in convivio aditiali licebit comissantibus uti - quamquam auctores sumus ut etiam in primo illo congressu participes, si possint, Latine loquantur. Attamen, convivio aditiali peracto, nihil inter ipsas sessiones dicetur nisi Latine, nullam per totum conventiculum linguam usurpabimus nisi Latinam.
Participes variis modis Lexintoniae commorari poterunt: I) In xenodochio discipulorum: qui suum et proprium cubiculum habebit, noctibus singulis vicena (20) dollaria (vectigalibus inclusis) solvet. Hoc xenodochium est in Academiae campis satis commode situm, unde homines brevissimo itinere ad locum sessionibus destinatum facile ambulare queant. At hoc in hospitio manentibus necesse erit balneis communibus uti. II) In 'Rubro Tecto': qui septem dies minimum ibi manebit, noctibus singulis quadragena septena (47) dollaria (vectigalibus inclusis) solvet. At ibi deversantibus opus erit vehiculis quibus inter deversorium et conventiculi sedem commeant . III) In hospitio 'University Inn' nominato: qui suum et proprium cubiculum habebit, noctibus singulis sexagena quina dollaria et denas centesimas (65.10) (vectigalibus inclusis) solvet. Oportet tamen lectores intellegere haec pretia nobis tempore aestivo esse anno bis millesimo sexto indicata et fieri posse ut nobis insciis mutentur.
Nonnulla etiam in Studiorum universitatis campis et in regione propinqua exstant refectoria, ubi multo vilius constant cibi quam in popinis urbanis. Erit praeterea mos noster ut, quoties commodum fuerit, cenam quandam communem apparemus, eamque sub divo, si caelum fuerit serenum. Qui talibus cenis communibus fruentur multo minus erogabunt pecuniae quam qui in popinis cenabunt.
Omnes qui huic conventiculo interesse meditamini ad Terentium Tunberg, linguae Latinae professorem, scribatis oportet, cuius est haec inscriptio cursualis electronica: terence.tunberg@gmail.com
September 09, 2006
Site Design:
J. Francis and Ross Scaife